Um FBÍ

Markmið FBÍ

Fornbílaklúbbur Íslands hefur það markmið að efla samheldni með áhugamönnum og eigendum gamalla bíla og gæta hagsmuna þeirra í hvívetna. Jafnframt vinnur Fornbílaklúbburinn að því að auka áhuga almennings fyrir gömlum bílum og glæða skilning á varðveislu þeirra og minjagildi.

Allt frá stofnum Fornbílaklúbbsins árið 1977 hefur hann náð umtalsverðum árangri í hagsmunagæslu fornbílaeigenda. Nefna má sem dæmi niðurfellingu bifreiðagjalda og stórlækkun aðflutnings- og tryggingariðgjalda, auk þess sem fornbílar mega nú bera eldri gerðir skráningarmerkja.

Þessi árangur er afrakstur ötuls starfs við að vekja skilning stjórnvalda á varðveislugildi gamalla bíla.

Fornbílaklúbburinn stuðlar að persónulegum kynnum eigenda fornbíla á Íslandi og hvetur félagsmenn til samvinnu um áhugamál sín, þannig að þeir geti miðlað hverjir öðrum af reynslu sinni og kunnáttu í meðferð og varðveislu gamalla bíla.