Landsmót FBÍ á Selfossi 24. - 26. júní 2011

Dagskrá verður uppfærð fram að móti eftir þörfum, uppfærð síðast 23. júní
Ath.dagskrá getur breyst vegna veðurs.

Landsmót FBÍ verður haldið á Selfossi helgina 24. til 26. júní, í áttunda sinn og verður væntanlega enn stærra en áður, áherslan eins og áður er að hafa mótið fjölskylduvænt.
Mótið er haldið í samvinnu við Bifreiðaklúbb Suðurlands og Sveitarfélagið Árborg.
Landsmótsstjóri verður Einar J. Gíslason.

Keyrsla frá Reykjavík verður kl. 19 föstudaginn þ. 24., en safnast verður saman á planið hjá MS Bitruhálsi (sjá kort) kl.18 og farið verður þaðan í 5-6 bíla hópum. Ekið verður um Þrengslaveg og komið inn til Selfoss frá Eyrarbakka, bílum verður safnað saman við Röraverksmiðjuna Set. Hópur af bílum frá Hollenskum bílaklúbbi mun aka með okkur, en alls verða 26 bílar frá þeim með okkur þessa helgi.

Mótið verður síðan sett með keyrslu að Landsmótsstað föstudaginn 24. júní,kl. 20:30.

Mótið sjálft og sýning bíla verður á Gesthús-tjaldsvæði  Kort. Tjaldsvæðið verður allt frátekið fyrir okkur eins og áður, búið er að fjölga rafmagnstenglum á svæðinu.

Grænt er svæði fyrir húsbíla og vagna sem þurfa rafmagn. Blátt er svæði fyrir tjöld, fellihýsi og er án rafmagns. Sérstaklega er bent á svæðið í kringum tjörninna þar sem meiri friður er. Ljósblátt eru húsin. Rautt er akstursleiðir og frátekin svæði fyrir mótið. Gult er þjónustubygging, WC og sturtur. Virðið merkingar á svæðini og 15 km hraðatakmörk.

Ath. Lausaganga hunda er bönnuð. Gistigjöld ber að greiða við komu hjá Gesthúsi.

Mikill áhugi hefur verið fyrir mótinu á Selfossi síðustu ár og gríðarleg stemning hefur verið á svæðinu. Að öllu óbreyttu verður mótið í ár ekki minna en í fyrra, en það sló öll met í mætingu bíla og gesta á svæðinu og allir hvattir til að mæta til að sýna sig og sjá aðra. Fyrir utan bílasýningu á laugardeginum verður ýmislegt í gangi hjá félögum og fyrirtækjum á Selfossi, en Delludagar verða á sunnudeginum líkt og í fyrra t.d. drullu-torfæra, mótorkross og fl. Grillað verður fyrir félaga klúbbsins við tjaldið okkar laugardagskvöldið og félagar skemmta sér saman. Sérstök dagskrá verður fyrir börnin um helgina og áhersla lögð á að allir standi saman í að gera mótið að góðri skemmtun fyrir alla. Allar upplýsingar verða uppfærðar jafnóðum.

Mótinu verður síðan formlega slitið á tjaldsvæðinu kl. 17, sunnudag.