FBÍ - Forsíða - Fréttir

BelAir uppgerðamyndir

Félagi okkar Gunnar Jónsson vildi deila með okkur myndum frá uppgerð á 1954 Chevrolet BelAir sem hann er eigandi að. Bíllinn þótti nokkuð góður fyrir, en ýmislegt kemur í ljós þegar litið er undir lista og annað. Bíllinn var allur tekinn í gegn með hjálp góðra manna og er hinn glæsilegasti í dag ,en uppgerðin tók rúmlega eitt ár og mætti Gunnar með bílinn beint á sýningu Kvartmíluklúbbsins vorið 2009. [10.03]jsl

Fræðsluferð í vesturbæinn annað kvöld

Miðvikudagskvöldið 10. mars verður farin áhugaverð fræðsluferð á verkstæði í vesturbæ Reykjavíkur þar sem verið er að gera upp gamlan súðbyrðing. Þarna fá fornbílamenn tækifæri til að kynnast gömlu handbragði, sem einnig var notað við yfirbyggingasmíði bíla á millistríðsárunum. Mæting klukkan 20.00 beint að Sólvallagötu 79, Hringbrautarmegin (við Grandatorg), en lokað verður í Árbænum þetta kvöld. Kaffiveitingar á staðnum í boði klúbbsins. [09.03]jsl

Margar hendur vinna létt verk

Framkvæmdir standa nú yfir nær daglega í fornbílahúsinu í Elliðaárdal enda í mörg horn að líta. Búið er að einangra alla veggi og nú er verið að ganga frá raflögnum og pípulögnum svo hægt sé að gifsklæða veggina. Næsta skref er að flísaleggja eldhús og klósett, en í framhaldi verður sett upp lagnaloft á eftri hæðinni. Að því loknu verður félagsheimilið málað. Margir hafa rétt klúbbnum hjálparhönd og hafa fagmenn klúbbsins unnið þar í sjálboðaliðsvinnu, meðal annars Steingrímur smiður, Gunnar rafvirki og Garðar málari. Harða kjarnann í vinnunni mynda hins vegar Rudolf Kristinsson, Sævar Pétursson, Erlingur Ólafsson og Ingibergur Sigurðsson, en þessir ágætu menn láta sig sjaldan vanta. Eins og flestir vita, sem nálægt húsbyggingum hafa komið, liggja þar fjölmörg handtökin, en vissulega vinna margar hendur létt verk. Hafi menn áhuga á að hjálpa til er þeim velkomið að hafa samband við Sævar formann í síma 895-8195. [08.03]ös

Chevrolet Nova Concourse 1977

Kristinn Sigurðsson sendi okkur nokkrar myndir af bílnum sínum sem er búinn að vera í uppgerð síðasta ár. Myndirnar er hægt að sjá hér og gefum honum orðið.

Bíllinn er Chevrolet Nova Concourse 1977, með 305 vél. Ég keypti bílinn árið 2006, en ætlunin er að hann fari á götuna 2011. Það sem eftir er að gera er að útvega smádót á hann, púst og nýjan vínýltopp og svo auðvitað að raða honum saman. Upphafið að ævintýrinu var að vinur minn Sigurbjörn Helgason fornbílamaður hefur samband við mig og lét mig vita af þessum bíl og að hann sé til sölu niður í landi. Honum að þakka var ég sá fyrsti sem hafði samband við seljanda (Takk Sigurbjörn). Bíllinn reyndist ryðlaus, en búið var að gera við ryðið. Það var hætt við uppgerð á sínum tíma en bíllinn var geymdur í einhver ár í upphituðu húsnæði. Ég er nýbúinn að lækka hann að framan, kem svo til með að lækka hann að aftan, fékk smá móral yfir því hvort að bíllinn sé of lágur að framan, en það kemur í ljós. Þið megið gefa mér ykkar álit á því. Ég er mjög ánægður með bílinn, enda finnst mér þetta vera flottir bílar, þó ég segi sjálfur frá. [05.03)ks/]jsl

Harley J. Earl

Guðjón Örn Stefánsson benti okkur á þessa síðu, sem er mikil samantekt um Harley J. Earl, en hafi einhver sett sitt mark á þróun útlit bíla á miðri síðustu öld þá er það hann. Harley hafði sterkar skoðanir á hvernig bílar skyldu vera hannaðir og kom hann víða við. Of langt er telja upp hvar hann kom við og bendum frekar fólki á að lesa greinina, vinstramegin á síðunni er síðan valið um undirgreinar um Harley J. Earl. [04.03]jsl

Museum of American Speed

Þröstur Reynisson sendi okkur ábendingu um þetta safn, Museum of American Speed, en safnið sérhæfir sig í öllu sem tilheyrir kappakstri. Ýmislegt fróðlegt er að finna á síðunni, en þar á meðal er síða um ýmsar keppnisvélar flokkaðar eftir árum og hægt að sjá nánari upplýsingar um hverja vél. [03.03]jsl

Fornbílaspjallið

Að gefnu tilefni er vert að benda á að Fornbílaspjallið er opið fyrir alla sem skrá sig þar, en sama á við spjallið og Fornbílaklúbbinn að engar kröfur eru gerðar um bílaeign eða annað. Spjallið okkar reyndar miðast við eldri bíla en 15 ára og verður það svoleiðis áfram, en spjallinu er skipt upp í nokkra flokka svo að flestir ættu að finna sinn stað og nú er búið að bæta við sérstökum "muscle cars" flokki. Til að vernda spjallborðið fyrir árásum "spam" eru allar nýskráningar yfirfarnar og samþykktar af stjórnanda og geta liðið 1-2 dagar þar til skráning verður virk, ath. að þeir sem eru með netfang hjá gmail verða að hafa samband við okkur til að fá aðgang, þar sem gífurlega mikið af rusli kemur frá gmail netföngum og það er of mikil vinna að eyða 30-40 skráningum á dag í viðbót við það sem er fyrir. [02.03]jsl

Fallinn félagi

Þann 12. febrúar lést félagi okkar Sigurður Þorvaldsson. Sigurður var búinn að vera félagi í klúbbnum frá fyrstu árum og var vel þekktur af eldri félögum. Útför Sigurðar fer fram frá Hvítasunnukirkjunni Fíladelfíu, Hátúni 2, í dag, 25. febrúar, og hefst athöfnin kl. 11. Stjórn og félagar senda öllum aðstandendum samúðarkveðjur. [25.02]jsl

Fornbílamyndir á opnu húsi 24. febrúar

Einn af dyggari félögum klúbbsins, Eggert Rútsson, mætir í Árbæinn miðvikudagskvöldið 24. febrúar og sýnir okkur myndir af gömlum bílum sem hann hefur tekið á liðnum árum, m.a. á ferðum sínum um landið. Húsið opnar klukkan 20.00 og hefst myndasýningin klukkan 20.30. Gert verður gott kaffihlé. [23.02]jsl

RV / campers 100 ára

Í ár er haldið upp á að 100 ár eru frá því að fyrstu húsbílarnir eða "campers" voru gerðir fyrir almenna sölu. Þeir fyrstu voru frekar bílar sem hafði verið breytt í það að vera með útbúnaði fyrir tjöld sem tengdust bílnum og ýmsar hirslur til að geyma útbúnað. Fljótlega urðu til húsvagnar sem voru dregnir og svo auðvitað bílar með áföstu húsi, oftast þekktir vestanhafs sem RV eða Recreation Vehicle. Ótrúlegustu útfærslur hafa orðið til í gegnum árin og bara ímyndaraflið sem takmarkar þær. RV/MH Heritage Foundation er stórt safn sem sérhæfir sig í varðveislu þessara bíla og sögu þeirra, en myndir fá safninu er hægt að sjá hér. Svo er bara að koma sér upp svona græjum til að mæta á Landsmótið í sumar. [19.02]jsl

Styttist í HERO fornbílarallið

Í vor verður aftur haldið fornbílarall hér á landi sem er skipulagt af HERO - Historic Endurance Rallying Organisation, en síðasta rall var haldið haustið 2008. Strax var vitað að annað rall yrði haldið, þar sem færri komust að en vildu en fjöldi bíla nú verður takmarkaður við 60, og er það fyrir utan þá Íslendinga sem vilja taka þátt. Rallið hefst sunnudaginn 9. maí og stendur til 15. maí. Nánar er hægt að sjá um rallið hér. [18.02]jsl

Ármiðar 2010

Félagar hafa verið duglegir við að greiða árgjaldið fyrir 2010, nú þegar hafa rétt um helmingur félaga greitt. Bent skal á að þeir sem vilja fá 2010 miða með næstu Skilaboðum ,að greiða þá fyrir 26. febrúar svo hægt sé að koma þeim með á útsendingarlistann. Þess má geta að stutt er í að félagatalið nái 1000, og miðast það auðvitað við virka félaga. [17.02]jsl

Mercedes Benz á kvikmyndakvöldi 17. febrúar

Á kvikmyndakvöldinu 17. febrúar verður sýnd merkileg heimildarkvikmynd um elsta bílaframleiðanda heims, en Gottlieb Daimler og Karl Benz hófu framleiðslu bíla í Þýskalandi árið 1886 og sameinuðust fyrirtæki þeirra árið 1926. Myndasýningin verður í félagsheimilinu í Árbæjarsafni sem opnar klukkan 20.00 og hefst sýningin stundvíslega klukkan 20.30. Gert verður gott kaffihlé. [16.02]jsl

Nýtt á varahlutasíðu

Varahlutanefnd hefur verið að bæta við myndum á varahlutasíðu og nú voru stuðarar teknir fyrir, en ýmislegt leyndist í þeirri hrúgu þegar tekið var til, bæði notaðir og nýjir. Einnig var nokkrum öðrum hlutum bætt við í ýmsum flokkum sem passar í Ford 1947. Þess má geta að posi er nú á Esjumelnum svo auðvelt er að ganga frá kaupum á varahlutum. [15.02]jsl

Safnanótt

Í kvöld verður svokölluð Safnanótt en þá verða flest öll söfn á höfuðborgarsvæðinu opin fram til miðnættis. Upplagt er að nota tækifærið og heimsækja eitthvað af þessum söfnum, en hér er hægt að sjá nánar um dagskrána. [12.02]jsl

Gamall nýr

Rúnar Sigurjónsson sendi okkur ábendingu um leið sem er hægt að fara ef maður fær leið á nýja bílnum sínum. Þó að PT Cruiser sé hannaður í anda eldri bíla þá er hann óneitanlega nýr bíll, svo að eigandi þessa bíls ákvað að flikka aðeins upp á hann og um leið að sækja til fyrri ára. Svo ar allt annað mál hvað fólki finnst um útkomuna. [11.02]jsl

Módelbílar í nýju ljósi

Michael Paul Smith gerir meira en að stilla upp sínum módelbílum í skáp og þurrka af þeim reglulega. Bílana myndar hann og býr til umhverfi sem hæfir tíma og gerðum. Allar myndir hans eru beint úr myndavélinni, ekkert "photoshop" eða gervi bakgrunnur, allt eins raunverulegt og hægt er. Hægt er að sjá myndir hans hér og inn á milli eru myndir af uppsetningu og hvernig hann vinnur þessar myndir. [10.02]jsl

Frá helginni

Síðasta laugardag var smá sýning bíla sem hafa verið smíðaðir eða yfirbyggðir hér á Íslandi. Var þetta gert til kynningar á þessari grein, en frekar lítið er fjallað um þessa grein. Í áratugi var t.d. smíðað yfir allar rútur sem fóru um vegi landsins og mikið er um smíði allskonar palla og tengivagna fyrir flutninga. Einnig var mikið smiðað yfir jeppa og voru margar útgáfur til af þeim húsum, en lítið fór fyrir þeim á þessari sýningu. Rafmagnsbílar voru einnig kynntir þarna, en nokkur tilraunastarfsemi hefur verið í gangi um að breyta venjulegum bílum í rafmagnsbíla. [09.02]jsl

Þorrablótið

Síðasta laugardagskvöld var haldið hið árlega þorrablót klúbbsins. Mikil aðsókn var og var uppselt, en húsnæði rúmar ekki fleiri en 95 í sæti. Maturinn var að venju frá Kjötsmiðjunni og ekki klikkaði hann frekar en venjulega. Leynigestur hafði verið boðaður og reyndist það vera Sigríður Klingenberg spákona og messaði hún yfir gestum með sínum hætti. Gestir skemmtu sér vel og dönsuðu fram á nótt. Myndir frá kvöldinu eru komnar á Myndasíðu, og eins fleiri og stærri myndir á lokuðu svæði fyrir félaga og sem pdf sýning. [08.02]jsl

Er áhugi fyrir go-kart?

Go-kart brautin við Korputorg er að bjóða klúbbsfélögum að setja upp keppni á tilboðsgjaldi kr. 6900 (stórt race) í stað venjulegs verðs, kr. 9900. Vinningar verða fyrir fyrstu þrjú sætin í formi gjafabréfs. BMW Kraftur og live2cruize hafa verið með sín mót og væntanlega fleiri klúbbar og er hugmyndin að þeir bestu frá hverri keppni endi síðan í lokakeppni. Þeir sem hafa áhuga á að taka þátt í þessu geta sent skráningu á jsl@itn.is og taka skal fram nafn, fjölda og síma fyrir næsta föstudag, 12/02 og mun þá koma í ljós hvort næg þátttaka verði. [05.02]jsl

Þorrablót Fornbílamanna

Næst komandi laugardag, 6. febrúar, verður haldið þorrablót okkar fornbílamanna í félagsheimili okkar í Árbæ. Því miður er uppselt í matinn en við hvetjum fólk þó til að koma og njóta kvöldsins með okkur. Húsið opnar kl. 19.00 og borðhald hefst kl. 20.00. Við í ferðanefndinni hvetjum menn til að koma í þorralegum fatnaði, svo sem lopapeysu og með sixpensara eða slíkt. Síðan verður leikin tónlist fram eftir kvöldi. Óvæntur leynigestur mætir, (ekki sá sami og í fyrra). [04.02]Ferða- og félaganefnd

Sýning næsta laugardag

Við gömlu Toppstöðina, beint á móti húsinu okkar við Rafstöðvarveg, verður sýning á íslenskri bílaframleiðslu laugardaginn 6. febrúar milli kl. 12 og 17. Með þessu er verið að vekja athygli almennings, fjölmiðla og ráðamanna á íslenskum bílasmíðum, en þær fara alla jafna leynt í samanburði við t.d. fatahönnun og tölvuleiki. Einir 25 bílar og tæki sem gefa góða mynd af stöðu og samkeppnisfærni þessa iðnaðar, og skapara þeirra, munu safnast þangað á planið fyrir framan stöðina, en inni verður aðstaða til að sýna myndir, glærur og annað, og spjalla við áhugasama úr hópi almennings og ráðamanna. Bílarnir eru allt frá sportbílum og jeppum til hópferðabíla og flutningabíla. Allt íslensk smíði. Ef einhver lumar á bíl sem á heima á þessari sýningu er hægt að hafa samband við Ara Arnórsson í síma 694 1974. [03.02]jsl

Leikfangabíll?

Fyrir helgi var verið að setja inn vörubíl í verslun BYKO í Kauptúni í tilefni "bílskúrsdaga" hjá þeim. Var fenginn lánaður 1946 Chevrolet vörubíll í eigu Kjartans Friðgeirssonar, voru þessar myndir teknar við það tækifæri. Það er ekki hægt að neita því að bíllinn virkar frekar sem leikfang í þessu umhverfi, heldur en vörubíll sem þótti stór á sínum tíma. [02.02]jsl

Landsmótsnefnd

Nýlega var ákveðið af stjórn FBÍ að setja í gang sérstaka nefnd sem sér um allt sem við kemur Landsmóti FBÍ. Aðaltilgangur er að hlúa að Landsmótinu og um leið létta á Ferðanefnd, þar sem þessi helgi kallar á langan undirbúning, um leið er stefnt að því að efla dagskrána og leyfa mótinu að þróast og stækka. Þorgeir Kjartansson verður formaður nefndarinnar, en með honum verða Einar J. Gíslason, Garðar Smári Arnarson, Heiðar S. Smárason, Jón S. Loftsson, Kjartan Friðgeirsson, Rúnar Sigurjónsson, Sævar Pétursson og Þorsteinn Jóhannsson. Garðar, Jón, Sævar og Þorgeir eru allir í stjórn klúbbsins og hafa verið í Ferðanefnd, Einar og Rúnar hafa báðir verið formenn Ferðanefndar, Kjartan var í fyrstu Ferðanedninni, Þorsteinn verður lykilmaður á Selfossi og Heiðar er mikill trukkakall og mun sjá um stærri bílana. Auk þess verða fleiri aðilar kallaðir til að sinna sérverkefnum. [01.02]jsl

Aldrei of lítill bílskúr

Margir lenda í því vandamáli að bílskúrar í dag eru frekar litlir, sérstaklega fyrir alvöru bíla eins og fornbílafólk á. En ef skúrinn er of lítill fyrir venjulegan bíl þá er hægt að gera eins og þessi maður, en skúrinn hans er 1,55 cm á breidd og bíllinn er 1.49 cm, en hvernig kemst hann út úr bílnum?. Myndbandið útskýrir allt og er þetta með betri lausnum sem undirritaður hefur séð. [29.01]jsl

Stormur stoppar uppboð

Það voru ekki ánægðir fornbílaeigendur sem vitjuðu bíla sinna eftir mikinn storm sem gekk yfir Scottsdale, Arizona. Búið var að reisa stærðar tjöld til að sýna bíla, en síðasta föstudag gerði mikið óveður með tilheyrandi rigningu og fauk eitt aðal tjaldið, 800 feta, og féllu þá súlur á bílana sem stóðu eftir í rigningunni. Ekki bætti ástandið ofurreglur Kanans, þar sem ekki mátti fara inn á svæðið þar til búið væri að úrskurða það óhætt fyrir fólk. Talið er að tjónið sem varð sé um 1.5 milljón dollara, en meðal þeirra bíla sem bjóða átti upp var 1948 Tucker Convertible sem er sá eini sem til er, en hann slapp með nokkrar rispur. Hér er hægt að lesa meira um uppboðið. [27.01]jsl

Myndir frá liðnu ári á opnu húsi

Á opna húsinu miðvikudagskvöldið 27. janúar verða sýndar myndir úr starfi Fornbílaklúbbsins á síðasta ári og þá ekki síst úr hinum fjölmörgu og fjölbreyttu sumarferðum klúbbsins. Dagskráin verður í Árbænum sem opnar klukkan 20 og hefst myndasýningin stundvíslega klukkan 20.30. Gert verður gott kaffihlé.
Ath. Uppselt er orðið á þorrablótið 6. febrúar. [26.01]jsl

Gömul vídeó

Eyjólfur Brynjólfsson hefur sett þrjú skemmtileg vídeó inn á síðuna okkar á Facebook. Eru þetta myndir fá 17. júní akstri árið 1982. Öskjuhlíð árið 1982 og frá uppsetningu fornbílasýningar í Laugardalshöll árið 1989. Til að sjá vídeóin þarf að vera skráður inn, en þar sem stór hluti Íslendinga er á Facebook þá ætti ekki að vera mikið vandamál að sjá þau hjá einhverjum, ef það er ekki til aðgangur. [25.01]jsl

Citroën Kegresse

Hérna er umfjöllun um Citroën Kegresse snjóbíla sem Vegagerðin var með fyrir stríð, en nýlega voru erlendir áhugamenn hér á ferð til að skoða þá tvo sem eftir eru hér. Þeir voru notaðir í póst og farþegaflutninga á Holtavörðuheiði, Hellisheiði, Fjarðarheiði og Fagradal. Bílarnir voru fluttir inn fyrir tilstilli Jónasar frá Hriflu og aðlagaðir að Íslenskum aðstæðum, byggt var yfir þá og settur í þá Ford mótor. Annar þeirra er á safninu að Skógum en hinn er í geymslu á Selfossi. Hér má lesa nánar um bílana. [22.01]Eyjólfur Karlsson/jsl

Spyker og SAAB

Í fréttum uppá síðkastið hefur verið rætt nokkuð um hollenska bílaframleiðandann Spyker og hugsanleg kaup þeirra á SAAB bílaverksmiðjunum, en hverjir eru Spyker? Fyrirtækið er hollenskur bílaframleiðandi sem stofnað var árið 1999 af Victor Muller (f. 1959) og byrjaði bílasmíði árið 2000. Allir bílar Spyker eru handsmíðaðir og verðmiðinn eftir því. Eftir því sem undirritaður kemst næst framleiðir Spyker þrjú módel: Spyker C8, Spyker D12 Peking-to-Paris og Spyker C12 Zagato og eru þetta allt ofursportbílar, Spyker hefur því verið rangnefndur lúxusbílaframleiðandi í fréttum hér að undanförnu. Ekki má rugla Spyker, sem hér um ræðir, saman við eldri hollenskan vagnasmið sem einnig hét Spyker, en það fyrirtæki var stofnað 1880 og varð gjaldþrota árið 1922. Gaman er að skoða myndir úr verksmiðju Spyker, en það má gera hér og svo er Spyker líka með flotta heimasíðu. [21.01]Guðjón Örn Emilsson/jsl

Nýr Boss

Helgi Guðlaugsson vildi benda okkur á þessa frétt um nýja Mustang sem byggir á Boss keppnisbílnum, en 40 ár eru liðin frá því að alvöru Boss-inn vann Trans-Am keppnina. Aðeins 50 bílar verða smíðaðir af þessari útgáfu. [20.01]jsl

Misheppnuð hreinsun?

Síðastliðið sumar var í gangi átak hjá ríkisstjórn Bandaríkjanna sem miðaði að fækkun eldri bíla og átti að hvetja fólk til að fá sér nýrri og eyðslugrennri bíla. Átakið fólst í því að fólk gat skilað inn gömlum bílum til eyðingar og fengið inneign uppí nýjan bíl, svipað og hefur verið í gangi í Bretlandi og við höfum fjallað um. Bílarnir þurftu að vera 25 ára eða yngri, eyða meira en 16L/100km, vera tryggðir síðasta árið og ökufærir. Fyrir bílinn fengust $ 3500-4500, þar að auki gáfu margir bílaframleiðendur afslátt af nýjum bílum, allt að jöfnuðu inneignina sem fékkst fyrir gamla bílinn. Eflaust er ekki eftirsjá í öllum þeim hátt í 700.000 bílum sem enduðu ævi sína í átakinu, en sé rennt yfir listann sést að inn á milli voru í það minnsta nokkrum áhugaverðum bílum skilað inn til eyðingar, t.d. 1987 Buick ASC GNX, 1997 Aston Martin DB7 Volante, 1997 Bentley Continental R, 1989 Pontiac Trans Am (tuttugu ára afmælisútgáfa), 1985 Audi Quattro, 1985 Maserati Quattroporte, 1985 TVR 280i convertible, 60 stk. AMC Eagle, 1007 stk. Chevrolet Camaro, 1611 Ford Mustang (Mustang rústar Camaro hér a.m.k.) og ýmsir aðrir áhugaverðir bílar eru líka á listanum. [19.01]Guðjón Örn Emilsson/jsl

Wheels and Wings

Á hverju sumri í Varberg, Svíþjóð, er haldið stórt bílamót sem tengist flugmóti og sýningu. Þarna er um leið varahlutamarkaður, rúntar og fl. á dagskrá og er þetta eitt af stærri mótunum í Svíþjóð. Hér er hægt að sjá myndir frá síðustu árum. [18.01]Kristinn Sigurðsson/jsl

Fleiri gamlar auglýsingar

Gamlar bíla auglýsingar getur verið gaman að skoða bæði til fróðleiks og skemmtunar. Greinilegt að framleiðendur voru ekkert að fela það fyrir neytendum hverjum þeir voru að reyna að skáka og gaman að sjá hvernig skotin gengu á víxl, bein og óbein. Á þessari síðu er hægt að skoða margar gamlar auglýsingar og hægt er að fletta upp hverjum áratug fyrir sig. [15.01]Guðjón Örn Emilsson/jsl

Gömul auglýsing

Auglýsingar sem birtust í blöðum á árum áður, sérstaklega rétt eftir 1900, voru oft mjög hátíðlegar og mikið lagt upp úr að hafa allar þéringar í lagi enda, var það mikill dónaskapur að þúa þá sem lásu auglýsinguna. Þessi auglýsing birtist í Speglinum árið 1928 og þar var verið að auglýsa nýjan Ford, auðvitað með öllu því sem var nýjast á þeim tíma og mikið lagt upp úr að lýsa vel og vandlega öllum kostum hans. T.d. er tekið fram að þetta sé aflmikill bíll, "Nýi Ford er óvenju fljótur að auka hraðann. Við reynslu á Tudor Sedan vagni með 2 farþegum í, jókst hraðinn á 8 ½ sek. Úr 8 km. upp í 40 km" og "Þjer gleðjist yfir því með hve miklum mjúkleika og öryggi hann þýtur af stað í þrengslum og umferð stórborgarinnar, hve eldfljótt hann brunar fram þegar stjórnandi umferðarinnar gefur merki og þjer stigið fæti á stillirinn". [14.01]Þorgeir Kjartansson

Dagskrá á Google

Calendar Fyrir þá sem nota Google Calendar þá verður framvegis öll dagskrá klúbbsins einnig þar. Þeir sem eru með þetta dagatal geta þá bætt okkar dagskrá inn á dagatalið sitt og séð hvað er á dagská og fengið áminningu um þá liði sem þeir hafa áhuga á. Ítarlegri lýsing verður auðvitað sett þar inn um leið og á dagatalið á fornbill.is. Slóðin á Google dagatalið. [13.01]jsl

Thunder Road á kvikmyndakvöldi í Árbænum

Á kvikmyndakvöldinu 13. janúar verður sýnd klassísk kvikmynd frá árinu 1958, Thunder Road með Robert Mitchum í aðalhlutverki, en hann skrifaði einnig handritið. Myndin fjallar um harðsvíraða bílstjóra í suðurríkjum Bandaríkjanna sem hafa það verkefni að smygla bruggi úr sveitinni til nærliggjandi borga á kraftmiklum bílum og það yfirleitt með lögguna á hælunum. Myndasýningin verður í félagsheimilinu í Árbæjarsafni sem opnar klukkar 20.00 og hefst sýningin stundvíslega klukkan 20.30. Gert verður gott kaffihlé. [12.01]jsl

Andreas nýtir veturinn

Andreas Schütt hefur mætt á síðustu tvö Landsmót okkar á Selfossi og í sjálfu sér er það ekkert til að tala um, þar sem margir mæta á mótið, en Andreas kemur lengra að en aðrir þar sem hann býr í Þýskalandi. Um leið og hann kíkir til okkar í heimsókn þá fer hann um Ísland og heimsækir vini sína og skoðar landið. Andreas á þrjá Ford Granada og núna er hann að klára uppgerð á þeim þriðja, Ford Granada Turnier 2,3, sem hann ætlar að mæta á í sumar, en hina höfum við séð á síðustu Landsmótum. Andreas talar, les og skrifar íslensku og hefur mikinn áhuga á landi og þjóð og fylgist vel með því sem er að gerast hér. Heimasíða Andreas. [11.01]jsl