FBÍ - Forsíða - Fréttir

Vestfjarðaferðin

Rúnar Sigurjónsson sendi okkur nokkrar myndir í gærkvöldi, en hann er einn af þeim sem fór í vestfjarðarferðina og henni lýkur næsta föstudag og væntanlega verður hægt að sýna meira af myndum frá þessari ferð í næstu viku. [28.07]jsl

Rabbkvöld annað kvöld

Rabbkvöld verður á dagskrá í Árbænum miðvikudagskvöldið 28. júlí. Húsið opnar kl. 20.30 og heitt á könnunni og nýjustu blöðin. [27.07]jsl

Þessir 10 bílar fóru ferðina frá Reykjavík

Vikuferð - Vestfirðir (3)

Fyrsta vikuferð Fornbílaklúbbsins í rúman áratug verður farin 23. – 30. júlí. Stefnan er tekin á Vestfirði, en brottför verður frá húsi Fornbílaklúbbsins í Elliðaárdal klukkan 13.00 föstudaginn 23. júlí. Fyrsta nótt verður á Hólmavík, önnur í Reykjanesi og sú þriðja í Bolungarvík. Word skjal með ferðalýsingu. [23.07]jsl

Kvöldrúnturinn

Í gærkvöldi voru sænskir bílar í öndvegi, en mætt var við húsið okkar við Rafstöðvarveg og haldið síðan í rúnt um Grafarvog. Góð mæting var, eitthvað um 45 bílar og auðvitað Volvo og Saab áberandi á þessu kvöldi. Rúnturinn endaði síðan aftur í dalnum þar sem var kaffi fyrir þá vildu skoða húsið. Nokkrar myndir frá frá þessu kvöldi eru komnar á Myndasíðu, og eins fleiri fyrir félaga og einnig sem pdf sýning. [22.07]jsl

1970 til 1980+ bíll óskast

Saga Film er að leita eftir bíl sem gæti hentað í sjónvarpsþáttaröð sem stendur til að gera. Helst er óskað eftir Ford Crown Victoria, en margt annað kemur til greina t.d. Ford LDT, Fairmont, Nova eða álíka bílar. Helst er leitað eftir bíl sem er ekki búið að gera upp en er samt þokkalegur í útliti og kemur bæði til greina leiga eða kaup. Þeir sem gætu átt bíl sem hentar geta haft samband við Svein Viðar á sveinnvidar@hive.is [21.07]jsl

Kvöldrúntur með sænsku ívafi (1)

Miðvikudagskvöldið 21. júlí munu félagar hittast við hús klúbbsins í Elliðaárdal kl. 20.00. Lögð er sérstök áhersla á sænska bíla en að sjálfsögðu eru allir fornbílar velkomnir. Úr Elliðaárdalnum verður lagt af stað kl. 20.30, ekið um bæinn og endað á kaffihúsi. [20.07]jsl

Harmonikka og heyannir í Árbænum

Á sunnudaginn verður mikið um að vera á Árbæjarsafni. Þann dag verður hin árlega harmonikuhátíð haldin og einnig verður hinn árvissi heyannadagur í algleymingi. Heyannir er árviss viðburður á hverju býli. Við Árbæinn verða amboðin tekin fram og gestum og gangandi boðið að taka virkan þátt í heyönnum eins og þau tíðkuðust fyrir daga heyvinnuvéla. Um aldir höfðu Íslendingar engin önnur tæki en ljá, orf og hrífu til að afla vetrarforðans. Víða var heyjað upp á gamla mátann fram yfir 1960, en nú eru gömlu handbrögðin sjaldséð í sveitum landsins. Það er því kjörið tækifæri fyrir þá sem vilja rifja upp fyrri kynni við orf og hrífur að taka þátt í heyannadegi Árbæjarsafns og þeir sem eiga gamlar dráttarvélar eða önnur landbúnaðartæki eru velkomnir til að taka þátt eða sýna. Dagskrá sunnudagins 18. júlí hefst kl. 13.00 og stendur fram eftir degi. [16.07]jsl

Gærkvöldið

Smábílarúntur var á dagskrá í gærkvöldi og var safnast saman við höfnina áður en lagt var í rúntinn, sem að þessu sinni var um Þingholtin og sjaldkeyrðar götur eknar. Auðvelt reyndist fyrir alla að rúlla þessar götur eftir að búið var að finna þær, þar sem margar af þeim virka eins og innkeyrsla að húsum. Rúnturinn endaði síðan aftur niður við höfn. Nokkrar myndir frá frá þessu kvöldi eru komnar á Myndasíðu, og eins fleiri fyrir félaga og einnig sem pdf sýning. [15.07]jsl

Meira frá síðustu helgi

Síðasta laugardag var picnic-ferð og gróðursetning á dagskrá. Mæting var við Kópavogskirkju og var þaðan ekið í gegnum Kópavoginn upp í Heiðmörk þar sem lundurinn okkar er og plöntur settar niður. Eftir það var komið við í Guðmundarlundi og þar voru picnic-töskurnar opnaðar. Rigning dró úr þátttöku í þessari ferð en þeir sem mættu áttu góðan dag. Nokkrar myndir frá frá þessum degi eru komnar á Myndasíðu, og eins fleiri fyrir félaga og einnig sem pdf sýning. [14.07]jsl

Smábílarúntur (1)

Miðvikudagskvöldið 14. júlí munu klúbbfélagar safnast saman á planinu við Hamborgarabúllu Tómasar í Geirsgötu. Þar verður boðið upp á kaffi og svo náttúrulega hamborgara á vildakjörum. Lögð verður sérstök áhersla á smábíla en að sjálfsögðu eru allir fornbílar velkomnir. Þaðan verður lagt af stað kl. 20.30 og smágötur Þingholtanna þræddar. Þeir sem treysta sér ekki í þröngar götur þurfa að kynna sér hjáleiðir. Ferðin endar við Hamborgarabúlluna. Leiðarlýsing og kort í GoogleEarth. [13.07]jsl

Ystafell um helgina

Síðasta laugardag var opið hús á Ystafelli í tilefni af 10 ára afmæli safnsins á þessu ári, en mikill gestagangur var um daginn á safninu. Nokkrir félagar skruppu norður af þessu tilefni og áttu góðan dag á Ystafelli eins og venjulega. Um kvöldið var BA með grillveislu í tilefni dagsins og Bíladaga, en eitthvað var um að fólk gisti þar sem búið var að gera smá tjaldsvæði fyrir þá sem vildu vera helgina. Alltaf er að bætast við safnið og margir góðir gripir þarna, nýjasta á safninu er 1919 Dixie Flyer sem eru orðnir mjög sjaldgæfir, uppsett verkstæði sem sýnir hvernig verkstæðisskúrar litu út áður fyrr, Oliver Cletrac HG beltadráttarvél og fl. Nokkrar myndir frá frá þessum degi eru komnar á Myndasíðu, og eins fleiri fyrir félaga og einnig sem pdf sýning. [12.07]jsl

Picnic-ferð og gróðursetning - Hattaþema! (1)

Á morgun, laugardag, er picnic-ferð og gróðursetning á dagskrá. Mæting er við Kópavogskirkju kl. 13.30 en þaðan verður ekið að trjálundi Fornbílaklúbbsins í Heiðmörk og tré gróðursett. Félagar eru beðnir um að taka með sér nesti því að eftir gróðursetninguna verður áð í Guðmundarlundi og útiverunnar notið.
Meira að gerast um helgina
Eins og hefur áður komið fram (sjá frétt neðar) þá heldur Ystafell upp á 10 ára afmæli safnsins á laugardag. Opið hús verður þar á milli kl. 14 og 17. Í tilefni þess ætlar BA að halda sína uppskeruhátíð að Ystafelli, en nánar er hægt að sjá um það á siðu BA. [09.07]jsl

Muscle-car rúntur

Í gærkvöldi var kvöldrúntur á dagskrá, safnast var saman við húsið okkar og haldið síðan út í Hafnarfjörð þar sem rúntur var farinn um miðbæinn og endað á Stöðinni þar sem nokkrir Hafnfirðingar tóku á móti hópnum og myndaðist þarna smá stemning eins og á rúntinum hér áður fyrr en verður seint endurtekinn. Nokkrar myndir frá frá kvöldinu eru komnar á Myndasíðu, og eins fleiri fyrir félaga og einnig sem pdf sýning. [08.07]jsl

Fatadagurinn

Síðastliðinn sunnudag var fornbíladagur í Árbæjarsafni og um leið fatadagur, en þá klæðast félagar fötum sem passa við tímabil bíl síns. Um 45 bílar mættu þennan dag og nutu félagar dagsins í skemmtilegu umhverfi eldri húsa og bíla. Nokkrar myndir frá frá deginum eru komnar á Myndasíðu, og eins fleiri fyrir félaga og einnig sem pdf sýning.[07.07]jsl

Musclecar-rúntur (1)

Sögusagnir ganga um mikla kraftabílamenningu í Hafnarfirði og af því tilefni ætlum við að kíkja á málið. Ferðin hefst miðvikudagskvöldið 7. júlí við hús klúbbsins í Elliðaárdal og er mæting kl. 20.00. Lagt verður að stað kl. 20.30 og endað á Stöðinni við Reykjavíkurveg í Hafnarfirði. Leiðarlýsing, kort í Google Earth. [06.07]jsl

„það má aldrei henda neinu, því þá þarf að leita að því daginn eftir“

Samgönguminjasafnið Ystafelli fagnar 10 ára afmæli í sumar! Af því tilefni verðum við með opið hús laugardaginn 10. júlí milli kl. 14:00 og 17:00 Boðið uppá kaffi og léttar veitingar. Saga safnsins verður kynnt en safninu hafa einnig borist nýir bílar til varðveislu og sýningar. Má þar m.a. nefna Ford Zephyr Zodiac árgerð 1955 sem Sigurður Pétur Björnsson (Silli), bankastjóri á Húsavík átti en Silli gaf Þjóðminjasafninu bílinn árið 1991 og nú er Fordinn kominn í varðveislu og til sýningar að Ystafelli. Einnig höfum við til sýningar Dixie Flyer árgerð 1919. Dixie Flyer bílarnir voru aðeins framleiddir á árunum 1916 til 1923 og eru afar fá eintök til í heiminum í dag. Sett hefur verið upp bílaverkstæði frá árinu 1940. Félagar úr Bílaklúbbi Akureyrar verða á svæðinu með bíla sína.
Verið velkomin. Samgönguminjasafnið Ystafelli, Sverrir og Guðrún Petrea. [05.07]

Fornbíla- og fatadagur í Árbæjarsafni (1)

Árlegur fornbíladagur í Árbæjarsafninu verður sunnudaginn 4. júlí, en þessi dagur er jafnframt árlegur fatadagur klúbbsins. Eru félagar hvattir til að mæta á fornbílum sínum, klæddir í stíl við aldur bíla sinna. Mæting er við safnið stundvíslega kl. 10 og verða bílarnir hafðir til sýnis á öllu svæðinu til kl. 15. Kaffi fyrir félaga í húsnæði klúbbsins. [01.07]jsl

Rúnturinn í gærkvöldi

Árlegi kvennarúnturinn var á dagskrá í gærkvöldi, en þá taka konurnar við stýrishjólinu og karlarnir fá að fljóta með. Rúmlega 40 bílar mættu og helmingur þeirra var með kvenbílstjóra svo betur má gera, en þessi rúntur hefur samt orðið til þess að fleiri og fleiri eiginkonur prufa að aka þessum "drekum". Farinn var langur rúntur frá húsinu okkar við Rafstöðvarveg út á Álftanes og síðan í gegnum Hafnarfjörð og endað á Amokka í Kópavogi þar sem öllum konum í ferðinni var boðið í kaffi af Ferðanefndinni. Nokkrar myndir frá frá kvöldinu eru komnar á Myndasíðu, og eins fleiri fyrir félaga og einnig sem pdf sýning. [01.07]jsl

Landsmótið gert upp

Eins og áður hefur komið fram þá er nýliðið mót það stærsta sem klúbburinn hefur haldið og ekki annað að heyra en að bæði félagar og gestir hafi verið ánægðir. Fljótlega mun Landsmótsnefnd hittast til að fara yfir dagskrána og sjá hvað má bæta eða sleppa og gera drög að næsta móti 2011. Til gamans má geta að franskur blaðamaður mætti til að skoða mótið og tók hann nokkur viðtöl við félaga og myndir sem munu birtast í La vie de l'Auto í júlí-ágúst. Einnig mættu fulltrúar frá Luchtgekoelde VW Club Nederland, en það er klúbbur loftkældra bíla í Hollandi, og er jafnvel von á 20-30 bílum frá þeim á næsta Landsmót, ef allt gengur upp. Dagskrá mótsins var skipt upp í ár og sá FBÍ um fyrri part og Bifreiðaklúbbur Suðurlands um dagskrá Delludaga á sunnudeginum. Þetta var gert til prufu og á eftir að koma í ljós hvernig félögum fannst takast til og hvernig skipting verður í framtíðinni, en dagskrá svona móts verður að þróast í gegnum árin. Landsmótsnefnd vill þakka öllum þeim sem komu að mótinu með einum eða öðrum hætti ,en svona mót er ekki gert nema með hjálp og aðstoð velviljaðra aðila. Sérstakar þakkir fá Árborg, Gesthús, ET, Kjötsmiðjan, Byko, Skeljungur, Vífilfell, Mjólkurbú Flóamanna og Lögreglan á Selfossi. Myndir frá frá mótinu eru komnar á Myndasíðu, og eins fyrir félaga, einnig sem pdf sýning föstudagur, pdf sýning laugardagur, pdf sýning sunnudagur. Myndir frá keppni fjarstýrða bíla og Delludögum óskast í myndasafnið. [30.06]jsl

Kvennarúntur (2)

Miðvikudagskvöldið 30. júní munu klúbbfélagar hittast kl. 20 við hús klúbbsins í Elliðaárdal. Þar munu konurnar yfirtaka stýrin og keyra karla sína um götur borgarinnar áður en áð verður á völdu kaffihúsi en þar býður ferðanefndin öllu kvenfólki upp á veitingar meðan karlarnir fá að sjá um sig sjálfir! Kvenbílstjórar fá aukamætingastig. Ferðalýsing og kort í Google Earth. [29.06]jsl

Vel heppnað Landsmót afstaðið

Landsmótið okkar var haldið á Selfossi um s.l. helgi og er óhætt að segja að mótið hafi verið það stærsta frá upphafi. Rúmlega 80 bílar tóku þátt í akstri um Selfoss að mótsstað á föstudagskvöldið, en mótið var síðan sett af starfandi bæjarstjóra Árborgar, Ástu Stefánsdóttur, og Landsmótsstjóra Einari Gíslasyni. Laugardagurinn rann upp með þetta fína veður og strax um morgunin var ljóst að mikil þátttaka yrði og þegar uppröðun var lokið kl. 13, þegar formleg sýning hófst, voru 180 bílar og tæki til sýnis yfir daginn, plús aðrir 40-45 sem komu í styttri heimsókn. Áætlað er að rúmlega 3000 manns hafi heimsótt okkur yfir daginn, enda var ýmislegt á dagskrá fyrir utan bílasýningu svo sem keppni í fjarstýrðum bílum, ratleikir fyrir börnin, vöfflusala, aðilar að kynna sínar vörur og handverk. Landsmótsnefnd skilaði sér ekki heim fyrr en seint í gærkvöldi og rétt að ná áttum eftir að hafa gengið frá helstu hlutum, svo nánar verður fjallað um mótið á næstu dögum, einnig á eftir að raða og yfirfara um 1100 myndir sem voru teknar um helgina. [28.06]jsl

Landsmótið sett

Í gærkvöldi var Landsmótið sett með keyrslu að mótssvæðinu og voru rúmlega 80 bílar sem tóku þátt í þeim akstri. Starfandi bæjarstjóri Árborgar, Ásta Stefánsdóttir setti síðan mótið formlega og bauð gesti velkomna. Fínasta veður var um kvöldið eftir smá rigningu um daginn og er spá fínu áfram í dag þegar sýning bíla verður á dagskrá ásamt fleiri liðum. [26.06]jsl

Landsmót Fornbílaklúbbsins 25. – 27. júní

Hið árlega landsmót klúbbsins verður haldið á Selfossi helgina 25. – 27. júní. Margt verður með nýju sniði en helstu liðir verða á sínum stað, þar á meðal hópakstur austur og keyrsla um Selfoss sem endar með mótssetningu bæjarstjóra Árborgar. Allir aldurshópar ættu að finna eitthvað sem hentar þeim um þessa helgi, en áherslan er lögð á að hafa hana fjölskylduvæna. Tjaldsvæðið verður allt frátekið fyrir félaga Fornbílaklúbbsins. Daggjald á tjaldstæði er 800 kr. á mann og 400 kr. fyrir rafmagn. Gistigjöld ber að greiða við komu hjá Gesthúsum. Í þjónustumiðstöð á tjaldsvæðinu er hægt að fá morgunverðarhlaðborð milli kl. 9 og 11. Allar nánari upplýsingar um dagskrá og mótið er að finna á hér og á www.facebook.com/landsmot2010. Mótið er haldið í samvinnu við Bifreiðaklúbb Suðurlands og Árborg. Mótsstjóri verður Einar J. Gíslason.
Sýning bíla
Laugardagurinn verður helgaður sýningu bíla, en meðal nýjunga eru kynningar á bílum, markaður með handverk o.fl., skottmarkaður varahluta, vöfflusala, keppni fjarstýrðra bíla o.fl. .allir velkomnir, kostar ekkert inn á svæðið. Grillið verður auðvitað á sínum stað um kvöldið en þá verður búið að loka svæðinu fyrir gestum.
Delludagar á Selfossi
Á sunnudeginum verða „Delludagar á Selfossi“ við Hrísmýri kl. 13 – 17. Þar verður boðið upp á torfæru, mótorcross, reykspól, hjóla-, bíla-, jeppa- og tækjasýningar, krakkarúnt og kassabílakeppni.[25.06]jsl

Jónsmessurúntur

Í gærkvöldi var kvöldrúntur á dagskrá, en að þessu sinni vorum við seinna á ferðinni en venjulega þar sem þetta var miðnæturrúntur. Farið var frá Skarfabakka og haldið út að Gróttu þar sem sólarlagið var skoðað, en eftir það stopp var ekið um vesturbæinn og endað í Nauthólsvík þar sem fólk átti góða stund þegar Jónsmessan rann upp. Nokkrar myndir frá frá kvöldinu eru komnar á Myndasíðu, og eins fleiri fyrir félaga og einnig sem pdf sýning. [24.06]jsl

Vegna Landsmóts

Þeir sem ætla sér að koma með bíla á laugardeginum og vilja vera með í uppstillingu bíla er bent á að koma kl. 11.30 en þá hefst uppstilling. Þeim sem koma eftir þann tíma eða ætla að stoppa styttra verður raðað upp eftir því sem þeir koma. Einnig er bent á að þeir sem skilja bíla eftir á svæðinu á föstudeginum verða að skilja eftir lykla hjá Landsmótsnefnd svo hægt sé að stilla þeim upp með öðrum bílum. Eins og á öðrum mótum okkar þá eru allir velkomnir með sína eldri bíla hvort sem þeir eru í klúbbnum eða ekki. [23.06]jsl

Miðnæturrúntur á Jónsmessu

Í tilefni Jónsmessunnar verður sérstakur miðnæturrúntur miðvikudagskvöldið 23. júní. Mæting er við Skarfabakka (Sundahöfn, sjá kort) kl. 22.30 og þaðan verður ekið kl. 23.00 alla leið vestur að Gróttu þar sem sólarlagsins verður notið. Síðan verður ekið um miðbæinn og endað í Nauthólsvík. Leiðarlýsing Sjá leið í Google Earth. [22.06]jsl

Styttist í Landsmót

Nú eru bara 4 dagar þar til Landsmótið hefst á Selfossi. Mótið sjálft verður með svipuðu sniði og síðustu ár en með ýmsum breytingum samt. Bryddað verður upp á ýmsum nýjungum á aðaldeginum, laugardaginn 26. júní og má þar nefna kynningu á bílum, skottmarkaður þar sem félagar mæta með sína varahluti og selja eða skipta úr skotti bíla sinna, vöfflusala um miðjan daginn og leikir fyrir börn á öllum aldri. Dagskrá er að smella saman og er hægt að sjá hana á þessari síðu (einnig á Facebook) ásamt öllum helstu upplýsingum um mótið og verða þær uppfærðar jafnóðum fram að móti. Dagskrá sunnudagsins verður að þessu sinni í höndum heimamanna, en Delludagar á Selfossi verða með ýmsar uppákomur við Hrísmýri, en rútuferðir frá tjaldsvæðinu þangað verða nokkrum sinnum um daginn svo hægt er að skilja bílana eftir á svæðinu. Nánar verður fjallað um mótið nær helginni. [21.06]jsl

17. júní akstur

Í gær var inn árlegi hátíðarakstur Fornbílaklúbbsins í tilefni þjóðahátíðar. Að þessu sinni var safnast saman við sundlaug Seltjarnarness þar sem félögum var boðið í kaffi áður en lagt var af stað í miðbæinn. Um kl. 13 lagði síðan hópurinn af stað í átt að Laugavegi en 70 bílar tóku þátt í þeim akstri. Í miðbænum var síðan lagt á stæðinu við Hafnarstræti fyrir aftan stóra sviðið og bílar voru sýndir þar til kl. 16. Myndir frá frá deginum eru komnar á Myndasíðu, og eins fleiri fyrir félaga og einnig sem pdf sýning. [18.06]jsl

Þjóðhátíðarakstur 17. júní

Árlegur þjóðhátíðarakstur verður fimmtudaginn 17. júní. Að þessu sinni er mæting við sundlaug Seltjarnarness kl. 11.00 árdegis. Þar verður boðið upp á veitingar í boði Seltjarnarnessbæjar, en brottför verður kl. 12.45. Elstu tíu bílunum verður raðað í aldursröð, en síðan verður frjáls uppröðun. Ekið verður út Nesveg, upp Hofsvallagötu, Hringbraut, norður Snorrabraut og niður Laugaveg og Lækjargata beygð til HÆGRI og svo aftur til vinstri inn einstefnu í Hafnarstræti að bílaplani bak við svið og þar tekur á móti okkur ferðanefndarfólk sem hjálpar okkur við að leggja. Æskileg viðvera er til 16.00. Skráning á ferdanefnd@internet.is. Dagskrá á Seltjarnarnesi. [15.06]jsl

Um helgina

Síðasta laugardag var fornbíladagur í Fjölskyldu og húsdýragarðinum, þrátt fyrir rigningu og meiri rigningu var ágætis mæting, 40 bílar. Tjaldið okkar bjargaði því að fólk hélst þurrt á meðan pylsur voru snæddar og börnin voru ekki mikið að spá í bleytu þegar frítt var í öll tæki og engar raðir í þau. Félagi okkar Andreas Schütt frá Þýskalandi mætti og vinir hans, svo að þarna voru mættir tveir bílar frá Þýskalandi, en Andreas er mættur til landsins með þriðja bílinn sinn sem við fáum að sjá á Landsmóti, en hann lauk við uppgerð á honum fyrir vorið. Myndir frá frá helginni eru komnar á Myndasíðu, og eins fleiri fyrir félaga og einnig sem pdf sýning. [14.06]jsl

Fornbíladagur í Fjölskyldu- og húsdýragarðinum

Árlegur skemmtidagur fornbílamanna verður í Fjölskyldu- og húsdýragarðinum laugardaginn 12. júní kl. 10-17. Eru félagar beðnir um að mæta með bíla sína milli kl. 9 og 10 um morguninn og er aðkoma frá Holtavegi (beygt niður af Langholtsvegi við Beco) sjá kort. Frítt verður í leiktæki fyrir börn þeirra sem mæta með bíla og pylsur verða grillaðar eftir hádegi. Viðvera bíla er til kl. 17. [10.06]jsl

Muscle-car dagurinn

Birgir Kristinsson sendi okkur slóð á þær myndir sem hann tók á muscle-car deginum, sem var síðasta laugardag á Kvartmílubrautinni. Þetta er farinn að vera árlegur dagur á KK þar sem áherslan er á ameríska bíla og menn reynt með sér á brautinni eða fengið tímamælingu á bílinn sinn. Bílum er stillt upp í "pittinum" og þar sýna menn sínar græjur og eiga góðan dag. [09.06]jsl

Frá helginni

Ferð var í Þorlákshöfn um helgina vegna sjómannadagsins. Nokkrir gistu alla helgina, en margt var á dagskrá alla dagana, en meira var um að félagar kæmu yfir daginn og auðvitað mættu þeir vel sem eru fyrir austan fjall. Íbúum elliheimilisins var boðið í rúnt um bæinn og farið var í siglingu og margt fl. sem félagar gerðu saman. Myndir frá frá helginni eru komnar á Myndasíðu, og eins fleiri og stærri myndir á lokuðu svæði fyrir félaga og sem pdf sýning. [08.06]jsl

Fiat X1/9 Bertone uppgerð

Félagi okkar Helgi Biering hefur verið að gera upp Fiat X1/9 Bertone og vildi benda okkur á síðuna sína um uppgerðina. Örfáir svona bílar komu hingað og enginn þeirra á götunni, svo gaman verður að sjá þennan þegar hann verður tilbúinn sem verður væntanlega í sumar ef allt gengur upp. [07.06]jsl

Helgarferð í Þorlákshöfn 4. – 6. júní

Um sjómannadagshelgi verða Hafnardagar í Þorlákshöfn og af því tilefni eru fornbílar sérstaklega velkomnir. Farnar verða tvær skipulagðar ferðir austur, sú fyrri á föstudegi kl. 18.00 og sú seinni á laugardagsmorgni kl. 9.00, báðar frá húsi Fornbílaklúbbsins í Elliðaárdal. Reyndar er heimilt að mæta hvenær sem er. Hópakstur um Þorlákshöfn kl. 20 á föstudagskvöldi og boðið upp á súpu. Á laugardeginum verður morgunkaffi í boði eldri borgara, hópakstur, sigling og bílasýning við bakaríið, en þar verður boðið upp á kaffi og kökur. Um kvöldið verður sameiginlegt grill í tjaldi klúbbsins. Ókeypis tjaldstæði og frítt í sund. [04.06]jsl

Gærkvöldið

Kvöldrúntur með áherslu á breska bíla var í gærkvöldi og var mæting við húsið okkar við Rafstöðvarveg, en flestar ferðir í sumar munu hefjast þar. Tæplega 60 bílar fóru rúntinn að þessu sinni í frábæru veðri og var stefnan tekin á miðbæinn þar sem var farinn léttur rúntur og síðan var farið í Kópavog og stoppað á kaffihúsi. Fyrir þá sem höfðu áhuga var farið í skúraheimsókn rétt hjá þar sem 3 félagar eru með aðstöðu fyrir sín leikföng. Myndir frá kvöldinu eru komnar á Myndasíðu, og eins fleiri og stærri myndir á lokuðu svæði fyrir félaga og sem pdf sýning. [03.06]jsl

Muscle-car dagur hjá KK

Laugardaginn 5. júní milli kl. 10 og 16 verður Muscle-car dagur á Kvartmílubrautinni, en þessi dagur er ætlaður fyrir ameríska "kagga". Til þess að geta keyrt brautina þarf bíllinn að vera skoðaður, vera með hjálm og auðvitað ökuskírteinið. Eigandi er ábyrgur fyrir þvi að athuga með viðauka hjá sínu tryggingarfélagi. Gjald fyrir þá sem vilja prufa brautina er: fyrir KK félaga kr. 1000, aðrir innan ÍSÍ kr. 2000, fyrir utan klúbba kr. 3000. Allir amerískir bílar eru velkomnir til að mæta og stilla sér upp í pittinum hvort sem þeir aka brautina eða ekki. [02.06]jsl

Kvöldrúntur með breskum ljóma

Miðvikudagskvöldið 2. júní verður þriðji kvöldrúntur sumarsins, en þá munu félagar klúbbsins hittast við hús Fornbílaklúbbsins í Elliðaárdal kl. 20.00. Lögð er sérstök áhersla á breska bíla en að sjálfsögðu eru allir fornbílar velkomnir. Úr Elliðaárdalnum verður lagt af stað kl. 20.30, ekið vestur Miklubraut, niður Skólavörðustíg, um Garðastræti og þaðan suður í Kópavog þar sem gerður verður stuttur stans við Álhólsveg 22. Síðan verður farið á kaffihús. [01.06]jsl

Bílamerkingar

Nú hafa verið gerð rétt tæplega 400 spjöld (sýnishorn) til að hafa í bílum félaga, en spjöldin er upplagt að leggja á mælaborðið þegar bílum er stillt upp. Spjöld eru gerð jafnóðum fyrir nýja félaga séu allar upplýsingar til staðar og síðan er verið að gera þau eftir því sem bílaskrá er uppfærð. Vanti einhverjum spjald fyrir 17. júní og Landsmót er hægt að senda póst á jsl@itn.is fyrir 12. júní, taka þarf fram félagsnúmer, bílnúmer, tegund, gerð, árgerð og vélastærð. Merkingar verða ekki gerðar fyrir 17. júni eins og áður, enda koma þessi spjöld í stað þeirra. Þess má geta að í Krambúð eru til sogskálar með krók fyrir þá sem vilja hengja spjaldið á rúðu. [31.05]jsl

Til hamingju BA

Bílaklúbbur Akureyrar átti afmæli í gær, en klúbburinn var stofnaður árið 1974 og er því 36 ára, en BA er elsti starfandi akstursíþróttaklúbbur landsins. Slóð á myndir frá skoðunardegi BA sem var í frétt um daginn virkar víst ekki lengur en hægt er að sjá þessar myndir hér. [28.05]jsl